ولادتي ببنتي بالشهر السابع و ماتابعها من مشاكل ..

الـسـلام علـيـكـم ورحـمـة الله وبـركـاتـه ..❤

قبل سنه في 15 ابريل 2015 كان يوم ولادة أروى الله يحفظها و يخليها لي ..❤

أكتب لكم قصة ولادة بنتي بالشهر السابع بعـد سنه من ولادتها .. ابي افيدكم واطمن الامهات اللي مثل وضعي .. لان عشت وقت صعب كل ما شفتها فرجت من مكان تعقدت من الثاني ,,, 

بس ربي كريم والحمدلله كيف مرت علي هذيك الايام .. وكيف كنت ابحث عن معلومات واذا قرأت شي خفت أكثر ,, وانا كنت ادور اي شي يطمني .. 

قبل ابدأ اقولكم قول الرسول صلى الله عليه وسلم ( دَاوُوا مَرضاكُمْ بِالصَّدقةِ ). ❤

اروى انولدت قبل وقتها كنت في الشهر السابع 31 اسبوع بدون سبب انفجرت الموية .. كان وزنها 1.6 كجم .. مرره صغيره .. 

ولادتي قيصريه وسويتها تخدير نصفي ما شفتها بعد ماطلعوها .. شفتها بعدها بيوم .. 

كانت بالحضانه .. العناية المركزة .. كانت تحت التنفس الصناعي وجلست اسبوع تاخذ الاكسجين بالتنفس الصناعي عن طريق الفم .. وبعدها بدأو يتدرجون يعطونها تنفس صناعي عن طريق الانف اوكسجين بالضغط .. بعدها اكسجين بالانف بس مو بالضغط العادي .. يبون الرئه تتعود تاخذ اكسجين من جو الغرفه ويراقبون مستوى الاكسجين بالدم .. 
الاطفال الخدج اللي يكونون تحت التنفس الصناعي يجيهم الربو وهذا اللي صار لبنتي بالشتاء جلسنا شهرين على البخار والفنتولين وادوية الربو بأنواعها .. 

كان عندها نزيف بالمخ يصيب الرضع الخدج intraventricular hemorrhage بسبب ان الاوعية الدمويه مازالت تتكون وممكن يصير عدم اكتمال نمو الاوعيه وتسبب نزيف طبعا هذه المشكله تصيب الاطفال المولودين قبل وقتهم .. وعليها يكون فيه بعض المضاعفات .. 

النزيف اللي كان في اروى من الدرجه الثانيه وبعد باسبوع صار من الدرجه الثالثه ويعتبر أسوأ .. و كانوا يسوون لها اشعه مقطعيه ct-scan كل اسبوع الى اسبوعين ويقيسون راسها مرتين يوميا .. لحد ما استقرت حالتها .. 

من بين مشاكل عدم اكتمال نمو الاوعيه الدمويه كانوا يكشفون على عيونها لان الاطفال الخدج ممكن لاقدر الله  يصيبهم نزيف بالعين ويصير انفصال بشبكية العين فلااازم الكشف على العين كل اسبوعين وكان وقت الفحص مايخلوني معاها واسمعها تبكي مرررره .. ما عرف طريقة الكشف .. 

كان الضغط عندها يرتفع ,,, يعطونها ادويه ومحاليل ينزلونه .. 

كانت ماترضع اول اسبوع وحاطينها على الاجهزه وموصلين لها NG TUBE انبوب تغذية مره عن طريق الانف ومره بالفم وبعدها صاروا يعطونها الحليب عن طريقه .. وانا كنت اشفط حليب وتقريبا يوميا اروح واودي معي الحليب اللي شفطته ويكون مفرزن .. واذا خلص الحليب يعطونها حليب من عندهم .. وانا اذا جيت ارضعها .. 

وكانوا يعطونها فيتامينات و وقفوها لانها سببت لها مشاكل بالمعده و يمدونها بالدهن عن طريق مكان الحبل السري .. 

جا لها صفار ... وعالجوها الاضاءه الزرقاء .. 

بالبدايه كانوا ما يغطونها ويخلونها بس بالبامبرز .. بس الجهاز من فوق يضبطونه يكون دافي وماتبرد فـ ماتحتاج مفرش .. 

بالضبط كان شكلها كذا 

جلست بالمستشفى شهر يعتمدون على وقت ولادتها بأنها تكون مخلصة الثامن ويطلعونها .. 
كل هالامور تصير وانا بين فتره والثانيه احس نفسي اضعف وشوي ارجع اقوى .. ويطلع كل ماواجهتي من تعب يزيدك قوة ..
أختبار من رب العالمين ولازم اصبر .. ❤

بصراحه اذكر ان الدكتور ما يتحمل اسألتي هو يشوف الامر عادي لأنه يشوف حالات كثير كذا وانا طبعا لا ما اشوفه عادي .. 

وجاء أجمل يووووم بعد تعب .. وطلعت أروى من الـمـستـشـفـى ... ❤❤

طلعت وهي باقي عندها نزيف بس متوقف يعني مستقر والدكتور قال اراجع عند دكتور جراحة المخ والاعصاب .. 

وعند دكتور العيون وعند دكتورتها .. يشكل اسبوعي الى كل اسبوعين اول 3 اشهر وبعدها كل شهر .. والحمد لله النزيف تلاشى وراح صرفة الجسم ..❤ 

ما أخفيكم كنت مرة متخوفه لايصير فيها شي وانا مو منتبهه .. كانت صغيييره طلعت ووزنها 2 كيلو الحمدلله بعد مانزل الى 1.2 كيلو ..

ان شاء الله أفدتكم طمنت الامهات اللي يمرون بنفس اللي مريت فيه ..❤

والحمدلله على كل شي ..❤

 الله يخلي لي اولادي ويصلحهم ويرزقني برهم يارب .. ❤